Ikkje særleg patent

No vil altså Peer Gynt AS, etterkommaren etter sjølvaste Peer, ta patent på både verdsborgaren, Bøygen, Anitra og Juvet. Kva skal dei gjere på Bøygen camping no? Og kva med alle dei som heiter Anitra (36 i følgje SSB). Eg studerte saman med ei av dei i Tromsø, ei triveleg jente det. No må ho truleg ut med ei årleg avgift til Peer Gynt. Eg sit her og grundar på kva for ord eg skal ta patent på. No er det jo tatt patent på Juvet, men eg trur Hoppesteinen er ledig enno. Hoppesteinen vår er jo ikkje så stor, men han er fin å hoppe fra. Tenk vi måtte bytte namn på han, berre fordi nokon ein dag tok patent på Hoppesteinen. Kva med trønderen, har nokon tatt patent på han? I disse dagar kunne jo eit ord som trøndertørke vore aktuelt? Då eg søkte opp ordet på Google, spør dei venneleg om eg meinte å skrive trøndertrøkk. Det hender seg jo at vi skriv ein ting og meiner noko anna. Eg tenkjer på Pippi. Ho hadde funne opp eit heilt nytt ord, var det skunk mon tru? Eg må sjå etter i litteraturen. Pippi var ikkje så oppteken av patent, og ho slapp som kjend å tenkje på pengar. Spurde ein Holesnusken om kva han meiner om patent og den slags, ville det nok komme kontant "Kva er det for føyseskap?"